(( قصيدة مديح حصرية على الغتر ))



ياللي تبي النوماس والبن والهيل
سير على فهد وفيصل ونواف
ليا جيت تلقى مكرمات المعاميل
امسطرات أدلال زافن وراء زاف
يفوح ريحت بنهن بالفناجيل
بالهيل والكادي عطايرهن اصناف
صفت ثعالبهن مثل صفت الخيل
مثل الصويتيات في غزو وانكاف
من بينهن تقول هرج وتعاليل
من حب أبوشاهين صايبهن اشغاف
ليا شفتهن جتني ادموعي مهاميل
على رفيقن صفهن قدمي اصفاف
اذكر تعاليله بهودن من الليل
بسوالفن منه لها اجذور واهداف
وتباشرن بقدوم ربعن حلاحيل
ما غاب أبونايف ولا نقص ينشاف
فزت احجاجن مثل نور القناديل
يبعد اهموم القلب عن ضيق واجحاف
في وسط بيتن للنشاما مداهيل
ملفى ومدهل للحشيمين الاشراف
الغتر طلقين الوجيه المشاكيل
وخلايف الحيين من روس الاسلاف
متوارثين الطيب جيلن بعد جيل
غرايزن في دمهم سلم واعراف
ذباحت القعدان والكوم والحيل
في وسط بيتن للمناعير مضياف
ونايف اليا ضاقت اصدور الدعابيل
مزبن رفيقه يوم الارياق نشاف
وقفات نايف ما تجي بالتساهيل
أبو محمد شوق منبوز الارداف
وقف بصفي يوم ذقت الغرابيل
الله درك يا بعد كل عكاف
وبدر اليا عدم ازحول الزواحيل
مفراص ماص وجامعن كل الاطراف
ليا جيت ابو ناصر تشوف التهاويل
بيت المكارم به مشاتي ومصياف
كنك ليا جيته على شاطئ النيل
لا يا بعد ناسن يعدون الاولاف
كساب للامجاد فعل ومحاصيل
ورثة اجدودن ما بها حكي واخلاف
وحسين راعي المرجله والتنافيل
مواقفه عند الرجاجيل تنشاف
وفلاح ابو تركي قبول الرجاجيل
متعلين بالمرجله راس مشراف
والغتر كل الغتر سيلن على سيل
مثل السحاب اللي يجي مزنه ارداف
شيبانهم يوم المعوشه بهاذيل
عليهم اثنوا ناس من كل الاطياف
تاريخ وافعولن رفيعة مناويل
يوم الزمان اللي سنواته اعجاف
الطيب فيهم مثل وبل الهماليل
لو هو مطر صارت بساتين وارياف
هذا وأنا ما اوفيتهم بالتماثيل
يشيب قافي ما تحاصيت الاوصاف
الكامل الله ما أدعي بالتكاميل
لاكن حلات الرجل به صدق وانصاف
وابي السموحه كان قصرت بالقيل
أن كان أنا قصرت في صيغة القاف
ربعي وانا معهم بكل التفاصيل
وليه معاهم بالمواجيب ميقاف
من دونهم عندي طلاسم محابيل
ماني ولد صالح من الضد خواف
ولا هز راسي جمرت القول والقيل
أنا رجل عاقل وشاعر وصراف
ولا أجامل المبغض على عيلة الميل
ولا لف راسي دون ربعي بلفاف
إن كان مالي بالصعايب مداخيل
لا خير فيه كان ما صبت الاهداف
ولا أجامل اللي وسط وجهه ثواليل
والجرب ما الحفها جلابيب والحاف
ما هي سواليف العفون المخابيل
اللي تجمع من تصاريح صحاف
واللي يبي الفتنة وكذب ومصاويل
يلقى لها غيري من الناس لقاف
ولولاي أشيم طيبين المفاعيل
وادراء الجماعة عن سواليف حذاف
لاقلب على ناسن اهنيا معاليل
وشخوصهم والله لاسرف بها اسراف
بعيونهم لاحط شوك وسماليل
ويصيبهم مني مذله ورجاف
مار اتشيم عن كلام المهابيل
أن جنبت ماني حريصن ومزهاف
ما أعامل المسلم أبسود المقابيل
لو تنكشف بالعقل غلفتها اغلاف
أن جنبت ما اجري عليها التحاليل
أجنب الشتلات وأعيفها اعياف
وصلوا على سيد البشر بالتهاليل
عد الحجيج اللي على البيت تطاف



الشاعر الكبير: جزاء صالح الحربي





توقيع :

ونعم ... ونعم ... ونعم ...

بالغتر كلهم كبيرهم وصغيرهم ..

بني عمي ويستاهلون المدح ولا يهونون الباقين ..

والحقيقة المدح ينحني عند الرجال اللي يستاهلونه ..

تقبلوا تحياتي

أخوكم / زيد الحباب العلوي

الأخ / زيد الحباب...

شكرا لمرورك.....