السلام عليكم..

كأول مشاركة لي في منتدى الشعر الشعبي

حبيت ابدا بعمل ديوان مقروء لأحد شعراء القبيلة المتميزين

وهو : لافي بن حمود الغيداني .. من بني عمر

وهو من سكان منطقة دخنة في القصيم

شاعر تميز باشعاره في الوصف والغزل والمدح.. وجميع اغراض الشعر

لدرجة انك تسمع .. وكأنك ترا

ماراح اطول عليكم ونبدأ باروع قصايده


1-يا مكثرين الهرج

يامكثرين الهرج لااسمـع ولااجيـب
تريحوا من فضلكـم واسمحـوا لـي

تريحـوا لاتلحـقـون المشاهـيـب
على الردى ماني شفـوق عجولـي

بالعقل والصبر ادب النفـس تاديـب
والا لهـا مـده تصـول وتجولـي

خلج ترازم فـي سيـاج المحاديـب
مافيهـن اللـي بالعقـال معقـولـي

اشد وطية زور مـن شمـخ النيـب
اليا ضاع مفعو ل الحيل والحلولـي

انا لاقلـت ارتـب القـول ترتيـب
حتى يجي كـي علـى فـك قولـي

اليا ارسلت لافكار القريحه مناديـب
ترايعن من عقـب ماهـن جفولـي

لكن مالـي مـن وراهـا مكاسيـب
لو كان عشاق القشـر صفقـوا لـي

مامستفيـد الا العـدو والاجانـيـب
ولاني مطيـع مقرقعيـن الطبولـي

خليتهـا تعطـي فجـوج مجاديـب
جربا تجود فـي رسنهـا مهبولـي

والله لااجنب دام لـي درب تجنيـب
من شرهة حشام الرفاقـه خجولـي

لو انهـا بيـن النحـر والتلابيـب
من الحيا وجهي مهـوب مغسولـي

طبـع لنـا نشـب عليـه ونشيـب
وطبيـعـةٍ لعلـهـا مـاتـزولـي

على الجماعـه للجماعـه مواجيـب
الا جهلـوا قـدر الرفيـق الهتولـي

ماني على ربعي قريـب محاضيـب
ادنـاة مايخلينـي اسـرج خيولـي

ان جات من طيب شقاها على الطيب
لو انها اعوج مـن رقبـة الذلولـي

وان جات من مسكين منطق واساليب
حطيتهـا بيـن الثـرى والنعولـي

لاحركت شعـره ولاطلعـت شيـب
ولاضيقت صدري ولاطـق جولـي

وان كان في صبري على ميلهم عيب
العيب تفتيـش الصـرر والحثولـي

لاقمت تذكر في رفيقـك عذاريـب
وتبيـن عيوبـه لذولـي وذولــي

صبرك على ربعك علاج وتطابيـب
يقصـر حبـال السالفـه لاتطولـي

حتى مايلقا فـي طرفهـا مقاضيـب
كـراه خيـر وللمشاكـل ميـولـي

واليا بليت بتايـه شـره وصعيـب
يقول انا العـراف وانـت الجهولـي

قـل الله الله ياحصـان الاطالـيـب
يالفاهـم العالـم عطيـب الفعولـي

هذا الكلام اللي مافي صحتـه ريـب
لانيب لاحولـك ولانتـاب حولـي

حصان وبن حصان طيب مجاذيـب
وبالمعرفـه رجـل محلـي ودولـي

خله يروح يخطي الدرب ويصيـب
يقول مابالنـاس عرضـي وطولـي

والفرق ماهـو باللحـى والاشانيـب
الفرق بين النـاس فـرق العقولـي

كم واحد تحسن بـه الظـن ويخيـب
السـن يضحـك والفـواد معلولـي

واللي غدت به كلمـة مالهـا غيـب
ماهو من اطيب ربعي اللي غود لـي

يالله عساها صيحة فـي قفـا ذيـب
وقلع النيـا بينـي وبينـه يحولـي

الرجل مايغصب على الطيب تغصيب
اليا صار ماهو دل ضمـن الدلولـي

ومن عادة اللي طيبه يحضر ويغيب
لاطالـت الرفقـة زهـوق ملولـي

واليا بلنك غبـر الايـام بصحيـب
في مستوى طيبه صعـود ونزولـي

اعرف ترى الدنيا دروس وتجاريب
والكامـل الله والنـقـا للرسـولـي

لاتصير مشذاب يقـص العراقيـب
خلـه وراع الاولـه وش يقـولـي

اخذت حكمه مـن كـلام اللواعيـب
للطيـب نـاس وللعـذارى فحولـي


2-باسم ربي

باسم ربي ابـدا ...واتعـوذ مـن الشيطـان
قبل ابدا كلامي.... والعـب القـاف واحوفـه

ياعالـم مالايعـلـم الـجـن ..والانـسـان
يامن كل خوف اصله خطأ ...ماعدى خوفـه

فرجك... ومدد عونك.... وفزعتك يارحمـان
وحجاك.. وذراك.. من اغبر الوقت وصدوفه

مضى وقت ...مثل الصايم الجايع العطشـان
يدور من المـا ...لـو ملـي راحـة كفوفـه

أقبل جبيـن الشعـر000 واستجـدي القيفـان
وبيت القصيد00 اشـوف فضلـه ومعروفـه

انا بشان00 وافراح البشر00 والشعر في شان
عن الشعر كلـه رغبـة النفـس مصروفـه

وجا مايحـرك هاجـس المشفـي المرضـان
علـى فتـل قيـد الشعـر بيديـن مشعوفـه

يدور علـى اللـي تفحمـه راسهـا مـالان
ويعرض عن اللي تعترض.. تقـل معسوفـه

بيوت القصيد الندر.. أحـذر مـن الغـزلان
قوانيصهـا يلحقهـم رهــاق.. وكلـوفـه

ياطير الخيال اصعد سما.. وافـرد الجنحـان
انـا شفـي اللـي غيـر عـن كـل مالوفـه

أحس اني اول مـره اقصـد وانـا طربـان
وتجيني ذلـول الشعـر ..بالشعـر مردوفـه

نعم طايش.. وشايش.. ومتنومـس ونشـوان
مـن اللـي بعينـي مثـل خلـق الله اشوفـه

تداعت هواجيـس القريحـه علـى الولهـان
ومن الشعر لهـل الشعـر غنيـت معزوفـه

وركبنا على افضل مانتجـت دولـة اليابـان
لاندكروز.. فاكس آر ابيضٍ.. تعجب اوصوفه

مع الدرب لاوحف صبح ..ولا اوحف مسيّان
تقـل مـروةٍ مـع شفـة البيـر محـذوفـه

لا والله ..زبنـت الله عـن الظلـم والبهتـان
مثل طلقـة العبـرود مـن بطـن شاخوفـه

هو غاية طلب مـن فكـر.. وعقّـد الحجّـان
نـوى طرقـةٍ بأنـواع الأخطـار محفوفـه

نصينـا عليـه اللـي تقلّـط لحـا الضيفـان
علـى الحشـو ..ودلال البغاديـد مصفوفـه

وللعـود الأزرق فـي سمـا بيوتهـم دخـان
يشابه ضبـاب اللـي ضحـا تـردم قنوفـه

بخب النقـع.. موقـع حفـل شمّـخ النيبـان
ومن الحربي اللي ماحضر واعلـن وقوفـه!؟

هذا الموقف اللـي ماعنـه عذرمهمـا كـان
يجي له حميّـا الرجـل ..ويخلـي ظروفـه

لو ظروفه أكثر من صفايـح حجـر ورقـان
يجمّـع ظروفه...ثـم يبنـط بهـا الطـوفـه

هنـا للتحـام الصـف ولوحدتـه عـنـوان
ومن يقدر يهـزّ الجمـع لالتحـت صفوفـه

ياخب النقع ..سولف للاجيـال.. والأزمـان
عن آخر حدث ..تاريخ حرب حضنه جوفـه

تاريـخٍ انجـازات اهلـه نالـت استحسـان
دهاة العرب.. مـن بـاب صنعـا ليالكوفـه

بروايـز صفحاتـه مـن اللـول والمرجـان
ومن واحد وعشرين الذهـب تكتـب حروفـه

تاريـخٍ ماضـرّي للتهـاون.. وللـخـذلان
مضـرا لتتويـجـه الأفـعـال منصـوفـه

منصوفه.. بين اللـي لبسـوا هامتـه تيجـان
وخلوها تعانـق هامـة الجـدي... وتطوفـه

تبا تقـوم ناقـة صالـح.. وعزهـا مانهـان
مدام ان بنـي سالـم... ومسـروح مكنوفـه

حرابة سلاطيـن الـدول.. منبـع الفرسـان
يـوم ان اليـادي طلـق ماهيـب مكتـوفـه

ضربنا اروع الامثال فـي نخـوة الجيـران
ودون اخويانـا نقطـع الــراس وانلـوفـه

فدينا الخـوي بـارواح ستـه مـن الشبّـان
غير اللي بشـذرة مرهـف الحـد منسوفـه

بالاد الحلال ان كان ماهـي علـى البرهـان
بالاسمـاع مسموعـه... وبالعيـن مشيوفـه

غير اللون الابيض للخوي مانعـرف الـوان
ماتصبح بنـا هقـوات الاصحـاب مكسوفـه

ونسـوي لاسوينـا المعاريـف بالمـجـان
مخلوفـه...والا انـشالله ماهـي مخلـوفـه

كذا طبعنـا ...مـن الله خلقنـا وحتـى الان
مواقيفـنـا بالخـيـر والـشـر معـروفـه

ولامنا عطينـا ظهورنـا.. قصدنـا حقـران
ماننظر خلاف.. ونترك الضعـف لضعوفـه

ولامنـا عطينـا نحورنا...نشبـه الطوفـان
نعـز الصديق....ولحيـة الخصـم منتوفـه

بحالة رضانا...نجـزا الاحسـان بالاحسـان
وبحالـة غضبنا....مانخلـي لنـا حسـوفـه

يعني ..نزعل الراضي..ونرضيك يالزعـلان
بيـومٍ معازيبـه تـبـرّا مــن ضيـوفـه

لنا في سنـام المجد..مجـد وحمـا واوطـان
وعلى غاربه نرقى...مانرقـى مـع ردوفـه

بكـل اختصار...اقولهـا بالـفـم الملـيـان
اخذهـا علـى ماقالـوا النـاس مكشـوفـه

لامنـا دخلنا...ندخـل مـع اوسـع البيبـان
على المجد...لين المجد يرخـي لنـا اكتوفـه

وبـاق القبايـل والنعم...مابهـم نقـصـان
على الله تعالى أدخـل عـن الظلم...وحتوفـه

يتبع

3-قصيدة في وصف اللاندكروز!

راكـب الـلـي كــن زولــه زول ذيــب
ان نطحـتـه .. وان قفيـتـه مــن ورا

وان عرض لك قلت مابالوصف ريـب
جـنـب ذيــب ٍ لاحـقـه جــوع وعـــرا

شاصـي التصميـم لانـد كـروز جـيـب
مايـبـيـعـه مــــن شــــراه لـيــاشــرا

مايبـيـعـه غـيــر مـــردي الـنـصـيـب
او مــن يـحـده عـلــى قـروشــه زرا

مـايـهــمــه لانـــفـــود ولاجـــذيــــب
ولا الطلـوع اللـي مـثـل طلـعـة كــرا

لاهمـزو قيـر أدبلـه .. جـالـه نحـيـب
مـثـل مــن ميـتـه عـلـى بـالـه طـــرا

نـاحـل الاطــراف تصميـمـه عـجـيـب
مــع سـمـاح الــدرب مشـيـه بخـتـرا

كـــن جـــرات الـربـابــه بالـسـبـيـب
صـــوت مــاطــوره لـيـامـنـه ســــرا

نـحـروه اللـيـل مــع وقــت المـغـيـب
الثنـيـن الـلـي عـلـى الـعـز أقـصــرا

ماعلـيـه الا صحـيـب ٍ مــع صـحـيـب
بالملح .. والزاد .. والطيب .. خشرا

ماعليهم مـن بسيـط .. ومـن صعيـب
بــالــدروب .. وبـالـمـحـلات خــبــرا

ودهـــــم مـايـمـرحــون الا قــريـــب
مــن مـكــان ٍ تـقــل لاجـــوه ومـــرا

مـن شعـيـب يحـدرونـه مــع شعـيـب
والفـضـى مشـمـوس والـديـره ثـــرا

ديـــرة ٍ ربـــي لـهـلـهـا مسـتـجـيـب
كــل وادي مــن فـضـل ربــي جـــرا

جوهـا مـن صـادق الوسمـي عشـيـب
لـلـحـبـاري والـقـطــا فـيـهــا حــــرا

نبتـهـا يـفــوح كـنــه فـــوح طـيــب
مـاتـصـدق بـالـلــي عـيـونــك تــــرا

والله ان عـمـاس راســـي مايـطـيـب
ولا يـطـيـب الــــزاد ويــلــذ الــكــرا

غيـر لا رقبـت النبـاء مـثـل الرقـيـب
ونمـت فيـهـا ايــام لــو شــح الــذرا

بالخصـوص لياصـدف جــو ٍ رهـيـب
وقمت ادوج مـن الفيـاض الـى القـرا

فــوق جـيـبٍ كــن زولــه زول ذيــب
ان نطحـتـه .. وان قفيـتـه مــن ورا


4-وهذه قصيدة للشاعر مطلق خالد حويقل العتيبي .. اللتي ارسلها للشاعر لافي الغيداني

يقول مطلق العتيبي

يالله يامنـزل تبـارك .. وياسيـن
ياعالـم ٍ غيـب الزمـان وعلانـه

ياوافي المدات .. ياقاضـي الديـن
انت المعين .. ونرتجيـك الاعانـه

بأسمك يجي للقاف قيمه .. وتثمين
وتوجه ذكـرك بقـدر .. وحصانـه

ياخلق الادم وزوجـه مـن الطيـن
ومحملـه يـوم اكتمـل بلامـانـه

ابداء بذكرك لجل تخزى الشياطيـن
وزين المثل يسهل علـي إدرجانـه

ياراكب اللي جاهز ٍ عقـب تمريـن
الاقطم اللـي فـارق ٍ فـي خوانـه

اللي عليه من الخواجـه مضاميـن
والضامن اللي ماش غيره ضمانـه

سبحان من يحمد على الزين والشين
الخالـق الـرازق رفيـع المكانـه

والا الشبح حايز عجـاب الملاييـن
ياماحلا عبـر الطريـق اسبحانـه

كنـه بمشـواره تقلـه جناحـيـن
والبعـد يسهـل لامشـاه اطويانـه

مايشتريـه الا الرجـال الثريـيـن
اهل الرصيد اللـي رفيعـن بيانـه

آخر مديل الفين .. في عام الالفيـن
من مصنع ٍ شغله نضيـف وتكانـه

ياسايقه باعطيـك منـي عناويـن
عنوان من جعلـه يطـول زمانـه

عنوان لافي ريف من جوه عانيـن
على الرحب يلقـون قـدر ورزانـه

اباك توصلـي سـلام ٍ بعـد حيـن
سلام من صـاف الفـواد ولسانـه

بعد البطا اللي صار له حول عامين
والوصل إله عنـدي حبـال ٍ متانـه

منصا سلامـي للرجـال المياميـن
لافـي وبـوه وكـل حـي ٍ وزانـه

سلام اخص ابه الموالي والاقصيـن
وكل ايمنن بالطيب مسرج حصانـه

يعـم جيرانـه .. وكـل الغياديـن
واللي لهم بالطيـب ماقـف وخانـه

من دافع الاخلاص والحـب والديـن
وسلم الرجال اهل العقـل والفطانـه

ابعث لهم من باقة الـورد نوعيـن
وخير الكلام اللـي يقـدم اسمانـه

يهدى لمنهـم بالمواجيـب ساعيـن
والبيت من ساسـه يزيـن ابنيانـه

مـادام حنـا بالحيـاة متخـاويـن
أخـوان بالملـه وشيـل الامـانـه

والمعرفه تربـط قلـوب العزيزيـن
اللي مسـار العـز لزمـو عنانـه

ياجب على الوافين وصـل الوفييـن
والوصـل يمليـه العقـل والديانـه

ودنياك يالافي بها العسـر والليـن
لـو ناحـرت ياعجلهـا قلبـانـه

مادامت لخيـر البشـر والسلاطيـن
ومن عاش فيها شاف منها الخيانه

والرابحيـن الصالحيـن الرشيديـن
هـل العقـول الواعيـه والذهانـه

اللي على سنـة محمـد حريصيـن
وابليس ماطاعـوه فـي مهرجانـه

على مسار الحـق دايـم سريعيـن
سعي ٍ رفيـع ولاسعـوا بالطمانـه

شرواك ياذخـر الرجـال الطليعيـن
اللي سـلاح الجـود حـدو سنانـه

يابن حمود ايامك اللي مضت ويـن
يامن معي عال ٍ مكانـه .. وشانـه

حنا على شوف المشاكيـل شفقيـن
والا الـردي يلقـى حليـه قرانـه

نشفق على الطيب وندعيه عجليـن
ودايم على الطيـب تجـوز الميانـه

والا الردي جعله وراء دولة الصين
حيث ان ماله في سما الكون زانـه

وقبـل تحيـات القلـوب الموديـن
من دافـع مـود ٍ لسانـه حصانـه

وصلو على خاتـم جميـع النبييـن
اللـي عطـاه الله كتابـه واعانـه

اللي ومرنا ننهـج المنهـج الزيـن
ورسم طريق الحق واوضـح بيانـه


وهنا رد الشاعر لافي الغيداني عليه

بديـت بأسـم مكـون الـكـون تكـويـن
المنـفـرد والمتـحـد فــي كـيـانـه

رب الحجـر .. رب الشجـر .. والثقاليـن
مـرسـل محـمـد وامــر ٍ باتبعـانـه

اللـي عبيـده لــه صـيـام ٍ مصلـيـن
يـرجـون رحـمـة ربـهـم وامتنـانـه

وعطفه .. ولطفه .. لاغدى الخلق نصفـن
ويشهـد علـى الانسـان حتـى بنـانـه

ياناصـر الرسـول فـي بـدر .. وحنيـن
ياجاعـل لـسـان البـشـر ترجمـانـه

انـت المعيـن ولاحـد ٍ غيـرك معـيـن
ومـن بعـد ذكـرك كـل شـي ٍ باوانـه

ياراكـب اللـي مـن حفيـزه اقـزوزيـن
تـو .. ودبـل زيـرو .. وون.. اصدرانـه

صـدّر خــلال انتخـابـات الزعيمـيـن
قـدام بـوش الابـن يكـسـب رهـانـه

قبـل استـلام البيـت الابيـض بشهريـن
و مجلـس شيوخـه .. وانظمـة برلمانـه

جي .. إم .. أس .. حروف وارموز .. تبيين
للمصنـع الـلـي صمـمـه والصيـانـه

احـدث موديـل بتكنلوجـيـا الصوالـيـن
والله عطـا الـلـي يصنعـونـه اتقـانـه

لياسـرى ماضـن مـن اللـيـل ثلثـيـن
وولـع مصابيحـه .. وولــع اسكـانـه

كـن اجماحيـاتـه شـمـوع المحبـيـن
فـي عيـد ميـلاد .. اوقـده شمعـدانـه

وكـن اشتغالـه هرجـة ٍ بيـن ثنتـيـن
يخفنهـا بـيـن الخـجـل .. واللعـانـه

ويشبـه لياقـام يتمشـى علـى هـويـن
مـشـي الفـتـاه المتـرفـه بمشيـانـه

ولياعطـا مردومـة ٍ كنـهـا ( قـيـن )
قـام يغنـج .. ويهـوس كـن اغنجانـه

شريفـة ٍ فـي حفـل نـاس ٍ شريفـيـن
ترقـص علـى يالليـل ادآنــه يـادآنـه

تهـز .. وتهـز الخصـر .. والذراعـيـن
ومـن راسهـا ماطـاحـت الاستكـانـه

وليامشـى مـن نجـد بيـن الصلاتـيـن
مايصـبـح الا فــي حــدود الكنـانـه

يصـرخ بعنـف .. لياخـذ شـوي بنزيـن
مثـل صـريـخ صغـيـر ٍ بالحضـانـه

ياسايـقـه بالله هالحـيـن هالـحـيـن
قـم دق سلفـه .. واربـط حـزام امانـه

حنـا عـلـى رد الجمـايـل مضـريـن
حاضـر بحاضـر .. والتهـاون جبـانـه

دسلـه .. وزدلـه بأشتغـال الصلنصيـن
ولايـحـرك الا بـآخــر ازعيتـمـانـه

خل الحصـى علـى حصـاه .. وحصاتيـن
يفـر مـن حـدره فـريـر (السمـانـه)

حـده علـى قصيـاه .. ياسايقـه لـيـن
تعـزف قـزوزه مثـل عـزف الكمـانـه

ويخلـي الـعـادم بـطـون الشكامـيـن
غليـون (حشـاش ٍ) بـراسـه شطـانـه

كنـه بتفكـيـره .. يـحـرر فلسطـيـن
ومستيـسـر ٍ شــارون بالخـيـزرانـه

نصه ديـار طيـور شلـوى .. الدماسيـن
وقل ويـن مطلـق .. ثـم لياقيـل عانـه

تلقـاه فـي بيـت ٍ يـذري عـن البـيـن
سلـم عليـه ومــن لقـيـت بمكـانـه

سـلام مـمـزوج ٍ بعـطـر الرياحـيـن
والا زبـاد ٍ تـو جــا مــن عمـانـه

ألـذ .. واحـلا مـن حليـب المـلاويـن
ليـاروحـن مـــن وادي ٍ ديـدحـانـه

مثـل الـزلـول الفـاخـره بالـدواويـن
ويلاعـب الغـربـي زهــر قحويـانـه

مقـدار ربـع ٍ لـوهـم بعـيـد غالـيـن
علـى خـفـوق ٍ قـدرهـم ماأستهـانـه

عيال عـود ٍ غـاب راسـه علـى الزيـن
ممنـوح مـن ربـه صــلاح البطـانـه

مطلق .. وغـازي .. والنعـم بالشقيقيـن
وأخوانـهـم .. والله علـيـه وامـانــه

ماهـو مكفيهـم لانـعـم .. ولانعمـيـن
هيـف السميـن اللـي كثيـر ٍ أدهـانـه

واهـل هـلا يامرحبـا فيـك .. وهلـيـن
وكـل ٍ حجـاجـه يعجـبـك بضحكـانـه

واهــل دلال قـنـاد غــال المثامـيـن
وافضـل نمونـه هيـلـه .. وزعفـرانـه

كنـه للضرمانـه صـعـوط المجانـيـن
ليـاذاقـه النعـسـان طــار إنعسـانـه

واقـول .. يامطلـق فــدوك الكثيـريـن
أهديتـنـي دره .. وبـاقـه .. ودانـــه

الباقـه الـلـي مــن ورود البساتـيـن
مـن كـل شـي ٍ زيـن فيـهـا إذنـانـه

منباعها مـن جـوف قلـب .. وشراييـن
وجـم ٍ تـصـدر بـالـروى عيطشـانـه

فيها عتب .. لكن علـى الـراس والعيـن
انــا مــدان ومعـتـرف بـالادانــه

إن كانـا بالـوصـل مـعـك متـرديـن
منـك السموحـه راس مــال الخـزانـه

امـا تـجـي .. والا نجـيـك متعنيـيـن
وكـل ٍ علـى اصحابـه وسيـع ٍ بطانـه

وصـلاة ربـي عــد وبــل الـوداديـن
عـلـى رســول ٍ عـزنـا باتبـعـانـه


5- اقبل :)

اقبـل يحـرك خـطـوة الـرجـل بـرفـوق
والـقــاع لمـصـافـح خـطــاه يـتـشـوق


مخـلـوق لكـنـه مـاهـو بــأي مخـلـوق
عـلــى بــنــات آدم وحــــوى تــفــوق


عليـه لبـس ٍ يجمـع الوسـع والضـوق
موسـع ٍ بعضـه .. وبعـضـه مـضـوق


مــر .. وتـعـدا مـابـدا مـنـه مـنـطـوق
الا انـــه بـجـيـش الـمـفـاتـن مــطــوق


خلاني امشي واقضـب الـدرب واتـوق
مـانــي بـتـايـق عـقــل لـكــن مــتــوق


تقووول مرمي ٍ على الارض من فوق
والا مــن الـسـم ﴿السقـطـري﴾ مــذوق


يغفـى عـلـي شــوي وشــوي ٍ افــوق
واقـــول لاستيـقـضـت والــبــال روق


مــدام لامـعـوق والا صـايـبـه عـــوق
وررررراه يمشي مثل مشـي المعـوق


اللي على حاله خطر مـن هـل السـوق
مـفـروض يمـنـع مـايــروح يـتـسـوق

6- قصيدة روعة: واهج الشوق


ما يبرّد واهج الشـوق و شعـور الهيـام
غير سردا تطوي البعـد بالسرعـة طـوي

بديها من خلف ما هوب مثلـه مـن أمـام
مستوي في حال و بحال ما هـو مستـوي

خشمها عبرود طلقـه و موخرهـا ابهـام
رافعـه راعيـه باشـارة ٍ مـا تنـغـوي

لا بدو دعا السفر و اعلنوا ربـط الحـزام
و ارشادات الأمن لو ترتطـم و لا تهـوي

و استلمها و احد ٍ خبرتـه عشريـن عـام
كبتـن ٍ بالله و بكتابـه ايمـانـه قــوي

مسلم عنـده خبـر بالحـلال و بالحـرام
جابله ربي على الديـن و سلوكـه سـوي

و اصعدت مثل أشقر ٍ فوق جو الصيد حام
ال مراوحها مـع الجـو لجـه و حـدوي

مثل ما يدوي صدى صوت رعّـاد الغمـام
صوتها صداه عبـر الفضـا يـدوي دوي

صنعة اللي ما عرفوا لا صلاه و لا صيـام
شعب ٍ أكثرهم ما هو عارف ٍ منهـو ذوي

بالنهار إلـى تعلـت كبـر فـرخ الحمـام
دونهـا آلاف المسافـات تزويـهـا زوي

و ان تغطلس بينك و بين رؤيتهـا الظـلام
كن في روس اجنحتهـا مشاهيـب بـدوي

دوبهم دكّوا عـن دلالـه الربـع الحشـام
تحتها من وقدت السمـر جمـر ٍ مجثـوي

دايم وربعه علـى جلسـة ٍ عنـده احيـام
أبلـج ٍ ليـن جنابـه لربعـه و حـمـوي

ما لي إلا هي إليا جاء للأشـواق احتـدام
و قامت الذكرى على القلب تكويني كـوي

لي شهر و شوي عيني محاربهـا المنـام
و دي احضر جـوازي و ادور لـي خـوي

بيني و بينه مسافـات و حـدود و نظـام
واحـد ٍفرقـاه شاويـة ٍ فـؤادي شــوي

بس أبا زوره مثـل مـا يـزارون الكـرام
لين عيني مـن قبالـه و شوفـه ترتـوي

لو بغيت اصبر و اكابر و اقو ل اني تمـام
ذيب حبه بيـن جـرد المحاديـب يعـوي

كان ما لي في دروب الهوى شف و مـرام
لين شفته و اشهد انـه هـواة المهتـوي

يا سلام الله علـى السلهمـة و الابتسـام
و يا سلام الله على اللي ما بيله مطـروي

كن ما الله حط في منطقة خصـره عظـام
و كن غيره ما احتوى مثل ماهو محتـوي

لا قعد مـا ودي يقـوم و ليـا قـام قـام
تلوي أعناق البشـر قومتـه يمـه لـوي

تقل بين أعلى الجسم و اسفل الجسم انقسام
شي من جسمه مرتب و شـي ٍ فوضـوي

استلمنـي فـي جبروتـه أشـر استـلام
ليـن طيّـح معنويـات رأس المعـنـوي

الغرام إليا بطـش فيـك ملعـون الرسـام
ما يعـرف هـذا قبيلـي و هـذاك خلـوي

يكبـر الرجـال أمـام المهمـات الجسـام
و يصغر الرجال أمـام الجمـال الانثـوي

ما يتحمل نظرة العيـن و ارخـاي اللثـام
لو باسه بأس رحمة حيـاة ابـن جلـوي!


7- تسوق السحاب

لعل السحاب اللي من البعد دوبه واق
على حد الارض من السما تسبر اعناقه

على ديرة دونه جنوبٍ عنه ينساق
تقفاه وتلملم شتاته وتستاقه

ذعاذيع ريحٍ ماتشيل وتحط رواق
يصحبها شوية عنف وانسامها رقاقه

لو تمر بيت البدو مترامي الاشناق
تهزه شوي شوي ماترمي رواقه

تسوق السحاب بدبرة المانع الرزاق
إلهٍ عبيده تطلب ارضاه واعتاقه

ولامنه تساوى فوق دارٍ غلاها فاق
حدود الغلا تستأذن الريح لفراقه

يقر ويسر البال .. والعين .. والخفاق
ويلجّّ رعده .. ويرفرف البرق بأشناقه

من بعيد برقه يسهر المسني المشتاق
هاكاالليل يقضي كل ليله على ساقه

كاانه يقول ليانتفض برقه الشعاق
على الهون تكفا ماعلى قلبي لحاقه

وصلها وباشرها على غيبة الاشفاق
جلال مطره مايعطي الوقت لدقاقه

تضيق بسخاه الاوديه والفضا ماضاق
بغيمه .. وهتانه .. ورعده .. وبراقه

يمد الجذع بالوصل .. والغصن .. والاوراق
بعد مااشتكى من هجره الغصن لوراقه

شهر .. ويتجاور فيه راعي غنم .. ونياق
بربله .. وحوذانه ضحى تشبع الناقه

تكحل بنبت فياضه العطره الاحداق
من يشوف نبته يشكر الله على ارزاقه

شذا نبت ريضانه ماينباع بالاسواق
مايجمع شذاها مع بعض غير خلاقه

تجلا بتنويع الزهر قدرة الخلاق
تلاوين نبته تأسر قلوب عشاقه

ربيعه .. وغدرانه .. متى مانهمر دفاق
لدارٍ لها كل الاحاسيس تواقه

سلامي عليها من اولي لاخر الارماق
ولها صادق الاشواق باقه .. ورا باقه

غلاها وسره دافنه في ثرى الاعماق
وأكيد الغلا ماجا من الباب .. للطاقه


8- عزي لمن

عـزي لمـن جـدواه عضـة إبهـامـه
مالـه .. ولابيـديـه حيـلـه وتدبـيـر

رجـاي باللـي مـن نواشـي غمـامـه
يسقي ثراه .. ويكسـي ارضـه نواويـر

هـو العظيـم .. ورب عـرش العظامـه
سبحانـه .. الخالـق بديـع التصـاويـر

يــارب قــوم والــدي بالـسـلامـه
واشفه .. ومتعنـي بشوفـه علـى خيـر

سبعـه وعشريـن .. اول ايـام عـامـه
وردن .. وصادنـه سـهـوم المقـاديـر

وعلـيّ جيـش الـحـزن ورّد حيـامـه
واجتاحنـي مثـل اجتيـاح الاعاصـيـر

قامت ضحـا .. بيـن الضلـوع القيامـه
رجاء .. وياس .. وحزن طاغي .. وتفكير

للقلب من ( قـوع ) العـروق انصرامـه
يـوم الا طـبـاء يكتـبـون التقـاريـر

يـزود نبـظـه .. ويتلخـبـط نظـامـه
واحس فـي كتمـه .. وافـك الازاريـر

يامـن لـك مـن الطيـب ذروة سنـامـه
وتقصيرك( بعكسه).. ماهـوب أيتقصيـر

ويامـن رسمـت أرقـى وارق ابتسامـه
على وجه شايب .. وشبـاب ..وصغيـر

البيـت عقبـك صـار نـوره ظـلامـه
امس بوجودك غيـر .. واليـوم ذا غيـر

فـي كـل ركـن ٍ مـن ركونـه علامـه
للحـزن .. ياموفـي حقـوق المسايـيـر

ياوالـدي مـسـك الـكـلام وختـامـه
أزمه .. وصارت لكثـر النـاس تفسيـر


9- العين عن حلو الكرى.. قصيدة جميلة


العين عن حلـو الكـرى موقهـا تـاب
ماتـذوق حلـو النـوم مــع ذايقيـنـه

اسباب لانه مـاش شـي ٍ بـلا أسبـاب
هكـا الغـزال اللـي ذبحنـي بزيـنـه

مـر يتخطـا .. ويتلفلـف بـالاسـلاب
وطيّـر عـن القلـب المشقـا يقيـنـه

من نظرته وقع علـى القلـب مضـراب
اشـد وقـع مـن الـرمـاح السنيـنـه

يسرق نظر عينه حذر .. مدري عجـاب
وانـا منـه قلـبـي تقـطـع وتيـنـه

عرّض ومـن تعريضتـه خافقـي ذاب
وقمـت اتبعـه مغيـر عينـي بعيـنـه

واقفى عجل من نظرتـي فيـه مرتـاب
ويحـط ضـول النـاس بينـي وبيـنـه

وصديت عنه وخاطـري منـه ماطـاب
كني ماني يمـه .. وانـا اقـول وينـه

اخاف يفطن لي .. وننشـب بالانشـاب
السـوق زحـمـه .. ولاوادم ذهيـنـه

واخذت عنه شوي مقفي .. والاعصـاب
متـوتـره .. مافـكـرت بتهـويـنـه

ولديـت .. ولينـه يسعـر يالاطـيـاب
عنـد الهنـود اللـي لغتهـم رطيـنـه

وارسلت يمـه نظـرة احبـاب لحبـاب
النظـره اللـي ماتركـت لـي غبيـنـه

وأقبـل يبـا يحطنـي عنـه مجـنـاب
وشكيت فـي ممشـاه .. علـى هوينـه

ناظرت فيه .. وضحـك النـاب للنـاب
ومـن ضحكتـه حلـت علـي السكينـه

وموه على اهل السوق .. واشر بالاهداب
اشــارة ٍ تبـغـى قـلـوب ٍ فطيـنـه

منها عرفت انه يبـا يعـود لـو غـاب
وان الامـر ماعـاد هـو فـي يديـنـه

وعقب غلاق اسبوع .. مر ومعه جـاب
صغـيّـر ٍ متـجـود ٍ فــي يميـنـه

صغيّـر ٍ بالـزيـن للعـقـل نـهـاب
يقـول اخـوي .. ومقصـده فاهميـنـه

قصده .. يقول انكـان عنـدك أستيعـاب
علـى مـن هـذا ؟؟ ملامـح وعيـنـه

واخذت انـا ويـاه .. مـزح وتعجـاب
عقلـه رزيـن .. وكـل كلمـه رزينـه

فـي موقـع ٍ عنـه المخاليـق غـيـاب
الا ملائـكـة العـمـل حاضـريـنـه

بينـي وبينـه مـاوقـف غـيـر الاداب
آداب سـلــم ٍ كـلـنـا وارثـيـنـه

منه حتـرام شعـور عربيـن الانسـاب
ومنه حتـرام الرجـل نفسـه .. ودينـه

وبغى الوكاد .. وقلت هايـم ومنصـاب
حبـك .. ذبحـنـي لعنـبـو والديـنـه

قال استميحك عـذر .. واقـول لعـاب
وش هالغـرام اللـي غدابـك بحيـنـه

وحلفت له .. واقسمت في رب الارباب
منقـذ مـن الطـوفـان راع السفيـنـه

انـي معـك صـادق ولانـي بـكـذاب
والـكـاذب الله لايـطــول سنـيـنـه

قال انت صادق .. مير سابقـك خطـاب
واهلـي فـي تـال الشهـر موعديـنـه

كـم لـه وهـو مغيـر ذهـاب إيـاب
لاهـم براضيـنـه .. ولا رافضيـنـه

وان كانهـا تمـت علـى يديـن كتـاب
وتـم القـران .. وروحــو كاتبيـنـه

انا تراي ابـي اعتبـرك مـن الاقـراب
وعلـى النقـا .. تبقـا صلتنـا متيـنـه

وودع وصـارت كلمتـه تقـل مشهـاب
اركت على كبـدي عراقـي مزينـه

وبقيت في وضع ٍ تحيـر ابـه الاطبـاب
ايسـت منـه وحالـة اليـاس شيـنـه

واخذت وقـت احسـب ايامـه حسـاب
وقلبـي علـى شوفـه تزايـد حنيـنـه

احيان .. اقول انشد عنه بعض الاصحاب
ويجيـك بالعلـم المـوكـد جهيـنـه

واحيان اقول اصبر على جور الاتعـاب
ورزق الفتى وأجله كتـب فـي جبينـه

وسكت .. ماودي عليـه افتـح ابـواب
للهرج مـن نـاس ٍ ماهـم راحميـنـه

وصبرت .. مير الصبر طـول ولاثـاب
ومـن طـال صبـره يالله انـك تعينـه

ويوم ان راسي من طويل الصبر شـاب
قـررت عنـه انشـد حـدا مجاورينـه

ونشدت عنـه وقـال راحوبـه أجنـاب
ومن قريتـه شـدّ .. وسكـن بالمدينـه

قلت ايه .. مـادام اهلـه عندنـا يجـاب
امـا بعيـد الفـطـر .. والا حتيـنـه

قال اهله معه رحلـو .. قلـت ياشـاب
يعـنـي لازايـركـم .. ولازايريـنـه

قال ايه .. مير انسـه والايـام هـراب
تطـول .. وتنسـي ضنيـن ٍ ضنيـنـه

قبلي .. وقبلك خلت اصحابنـا حـزاب
وكم فرقـت بيـن الخديـن .. وخدينـه

ماعاد في شوفـه طلايـب .. وطـلاب
تـرى مـاعـاد الا يــدرج جنيـنـه

وش تطلبـه .. وحبالـه بكـف قضـاب
احذر .. لاينصب لـك زمانـك كمينـه

قلـت الرجـال مفتلـة روس الاشنـاب
لقسـى الظـروف حسابهـم حاسبيـنـه

وقفيت من عنده على الغلـب .. غـلاب
اكن غيـض القلـب .. واجحـد ونينـه

واعلنت ياسي .. وانطوت صفحة كتـاب
مــن البـدايـه للنهـايـه حـزيـنـه

واقــول يالله لاتـبـارك بالاسـبـاب
اللـي رمتنـي بيـن حبـه .. وبيـنـه

10- طول نكد بالي

طـول نكـد بالـي وطـول عمـاسـه
مضى شهر وشوي والوضـع هـو هـو

وانـا الـذي يقتـل برجـواه ياسـه
في ظاهري حسره .. وفي داخلي ضو

ولايعلـن الؤمـن مـن الله فـلاسـه
لكن وانا اومن بالقضى والقـدر .. لـو

بيني وبيـن الدردشـه والوناسـه
مـســافــة ٍ مـاظـنـهــا تـنـتـهــي تـــــو

اللـي دهـاه الوقـت باأعـز ناسـه
تعيش الناس بجو .. ويعيش فـي جـو

ياليت مابالوقت غدر .. ونحاسه
ولاصابه من سهوم غيـب الدهـر سـو

او .. ليتني فارقت دنيا التعاسـه
قبل يصاب .. وقبـل اشوفـه كـذا .. أو

ياليته براسي عنـه .. مابراسـه
وانـا المريـض .. وكامـل العافيـه هـو


11- الدمعه

ماتهون الدمعه اللي على خدك جرت
علمتني كيف الاحساس بالغيره يكون

كنها يوم استهلت على الخد وسرت
خنجر ٍ مرت على القلب واشبعته طعون

لاذكرها الله بالخير مني لاذكرت
ليلة ٍ صارت مشاريه .. وعتاب .. وشجون

بنت .. انا اكبر من ظنون ٍ على بالك طرت
مثل مانتي عندي أكبر كثير من الظنون

كذّبت عليّه أصدق ظنونك وافترت
الظنون احيان نوع ٍ من انواع الجنون

فكري .. ليه القضيه لهالحد اكبرت
دامت انا كل واحد على الثاني يمون

ياهلا والله وسهلا استهلت وامطرت
في دموع الغيره اللي عليّه ماتهون


12- سلام وصباح الخير!

كلمة سلام وصباح الخير كـثّرها
ترا لها وقعها في نفس مجنونك

ودي تروووح وتجي حتى تكررها
ماامل منها ولامن مشاهد عيونك

عيونك اللي قلوب الناس تآسرها
من شافها تفتنه ويصير مفتونك

موتي وانا حي يستوطن محاجرها
مابيني وبينه الا (غمزة) جفونك

جابتك لي صدفة ٍ مدري وش آخرها
وانا تركت الجميع وقلت ممنونك

سلمتك الروح تنهاها وتامرها
ياللي خوانك على زينك يحسدونك

لك صورة ٍ برهنت عظمة مصورها
عجزت اوصفك واتخيلك وش لونك

لك هيبة ٍ ماتخليني اناظرها
ارفع لك اشوف مير يطيح من دونك

ابطيييت وانا المشاعر عنك ساترها
وانته تبختر وتاخذني على هونك

واليوم جتك المشاعر هي وشاعرها
متقاسمين الوجل وش لون يرضونك

كلي أمل ماتجي مكسور خاطرها
وانا اوعدك ماتخونك فيه إضنونك

والا اعتذر ورفض الاشوااااق وانكرها
وارتح وخله يزووود هباااال مجنونك


13- أبيات..

متى يصير المكان بجيتك فرح
وأفرح معه فـيك ياغلا من يجيني

اللي لك بوسط قلبي مايبي شرح
الظاهر انك تشوفينه بعـيني

بنيت لك بالمحبه داخلي صرح
وطول غـيابك وانا طول حنيني

خلا ني اصبر عـليك اسلوبك المرح
بكره..وبعـده .. وانا راحت اسنيني

اما تعالي غلا .. والا ابعـدي جرح
اختاري اللي تبين وعـلميني


14- نوف :)


تنفعني المره على بيت اهل نوف
لوكان مالي عند اهل نوف حاجه

الجادل اللي لافني حبها لوف
لوف الهشيم اللي تلوفه عجاجه

مارتاح لين اشوفها بالنظر شوف
واخذ على بيت الحبيب ادراجه

اروح قلبي من صخر ماعرف الخوف
ويبدي علي الخوف حين انتواجه

لاشفتها جاني عن الهرج صادوف
مغير اهز الراس مثل الخواجه

والمجال مفتوح لزيادة هذا الديوان ..او تصحيحه اذا ورد فيه اي غلط :)

تقبلوا تحياتي..

بسم الله الرحمن الرحيم

يعطيك العافيه

اخ / ماجد العوفي

وبهذه المناسبه يسعدنى ويشرفنى انضمامك معنا بين ربعك وابناء عمك

ونتمنى التواصل الدائم

وقصايد جميله ولها معانى طيبه

والموضوع يستحق التقدير

نتمنى لك التوفيق وبنتظار كل ماهو جديدك

تقبل تحياتى

اخوك

احمد العوفي

الله يعطيك العافيه يا ابو خلف

كفيت وفيت والشاعر لافي الغيداني غني عن التعريف شاعر كبير وموهوب

ونتمى له التوفيق والازدهار ويستاهل من ينشر قصائده

وجزاك الله خير الجزاء

الله يعافيك يا أخ/ احمد العوفي :)

وصدقني اذا قلتلك بان انضمامي لكم يسعدني ويزيدني شرف اكثر :)

والله يديم المحبة والتواصل بينا

وبالنسبة للموضوع .. فيكفيه مشاركتك ....

شاكرلك مرورك الكريم عالموضوع .. وابداء رأيك فيه

تقبل تحياتي

شكرا على مرورك يا بو مفرح.. والله يعافيك

ويجزانا ويجزاك كل خير

القصايد هذي تجميع شخصي.. يعني ليلحين ما شفت ديوان للشاعر!!

واتمنى ان يكون موقع حرب الكويت.. هو اول موقع يعمل ديوان مقروء لشاعرنا الكبير

شاكرلك مرورك الكريم

احترامتي

http://moseqar2002.jeeran.com/top10.gif

صـــــح لــــســـانــكـ يا ابــو خــلــــف

ولــســــان ابــو حــمـــــــوووود

وعـــســــاكـ عـلـــى الـــقــــوه كــفــيــــت ووفــيـــــــــت

وان شــاءالـلـــــه نـحـاول جـمـــع قــصــايــــد ابــو حــمـــووود

وقــصـايـده كــلــهــــآ درر وانـا عـجـبـتـنــي هالـبـيــتــيـــن بـزيــاده شــوي ،،،



والله ان عـمـاس راســـي مايـطـيـب ***** ولا يـطـيـب الــــزاد ويــلــذ الــكــرا

غيـر لا رقبـت النبـاء مـثـل الرقـيـب ***** ونمـت فيـهـا ايــام لــو شــح الــذرا

ولا هــــنــــــــــــــــت يالـــذيـــــب

السلام عليكم

الله يقويك ويخليك يالسنافي

نور الموضوع بمشاركتك :)

وصح السان ابو حمود.. وانا مجرد ناقل :)

والله يعيننا على جمع القصايد .. لأن ابو حمود.. مقل بمشاركاته الاعلامية

شاكرلك المشاركة الرائعه

اغلى تحية

مشكور على النقل الجميل بارك الله فيك

موضوع جدا طويل ومميز

شكرا ابو حرب على مرورك الكريم

=============

مرحبا والله يا فيصل .. شاكرلك مرورك عالموضوع.. تحياتي :)

اللة يعطيك العافية على المجهود الطيب
وصح السان الشاعر ...

وتقبل تحياتي...

الله يعافيك يا عريفان .. وصح بدنك

شاكرلك مرورك الكريم