السلام عليكم ورحمة الله وبركاته

اخواني الاعزاء.. بصراحة.. انا احترت ... وين احط موضوعي

احطه بقسم الشعر المختص بالقبيلة ؟ ولا احطه بقسم القصص والتراث ؟ ولا احطه بقسم الشعر الشعبي ؟

فقررت اني احطه بقسم الشعر الشعبي.. لأن الهدف الاساسي من هذا الموضوع هو كتابة قصيدة الشاعر سبيل بن سند رحمه الله.. والقصيدة صداها تعدا شبه الجزيرة!!

والقصيدة لها سالفه طويلة .. وراح احاول أطرحها باختصار وبطريقه مهذبة :)

وقصتها : ان الامير محمد بن احمد السديري.. قد ألف كتاب اسمه "أبطال من الصحراء" وقد اعتمد في كتابه على مراجع قبيلة معينة .. وتغاضى عن مراجع القبائل الاخرى .. والسبب هو قرب تلك القبيلة منه

المهم .. مالكم بالطويلة.. السديري في كتابه للأسف تجنى على عدة قبائل.. ومنهم قبيلة حرب

فتصدى له عدد من الشعراء.. منهم الشاعر محمد العسيلي الحربي رحمه الله.. وهو الذي تربطه صداقه قوية بالسديري

فأرسل الشاعر محمد العسيلي قصيدة للسديري يلومه فيها ويعاتبه ويصحح معلوماته.. لكن للأسف القصيدة هذي ما لقيتلها اي اثر!!

لكن السديري رد على الشاعر محمد العسيلي .. وقام بمدح قبيلة حرب .. ونزههم عما ورد في كتابه!!

ويتضح من مطلع القصيدة .. انها جاءت كرد على الشاعر العسيلي

يقول السديري

اهلا عـدد مامـال ريـح بنبنـوب
من خاطـر هـرج الردى ما هذابـه

أحلى من السلسال في صافي الكـوب
والـذ من نقـع المطـر من ربابـه

من خاطـر يشفق على كل محبـوب
ويجعـل رفيقـه دون كل القرابـه

يكـن له ما كن يوسـف ليعقـوب
ويحمى قفـاه بحضرتـه مع غيابـه

ويذريه مايشكـي عنا كل لاهـوب
ويزيـد له بالطّيـب عن ماهقابـه

العمـر من دونه رخيـصٍ ومجلـوب
ولايستمـع بهـروج حيٍ حكابـه

نفتح له صـدورٍ تذرّا ورى جيـوب
وعن مايعيـب منـزهـيّـن شنابـه

يابن العسيلـي مابكم كل معيـوب
حاشـا ولافـي طيبكـم مايعابـه

لكم على الجـودا محاريـف ودروب
وراسيـن مثل المعتلـي من هضابـه

ودياركم حامينهـا بكل مسلـوب
باللـي غـزاهـا مشرعيـنٍ ذبابـه

حامينها عن ضيم غاصب لمغصـوب
ويامـا دخلتـم دونهـا من حرابـه

ياما نثـرتم دونهـا الـدم مسكـوب
اروى لعطشـان الثّـرى من ترابـه

ياهل السّبايـا اللي لها الاصل منتـوب
معمّقـات مـن عصـور الصحابـه

سلايـل من فوقها الحـرب لحـروب
دايـم على الـرّدات عـوج رقابـه

وان جا نهـار مشعل الحرب مشبـوب
فانتـم على الطّوعـات مثل الذيابـه

نعـمٍ بكم والسيـف مشهر ومقضوب
ان حـل باطـراف الجهامـه ضبابه

اعني بني سالـم ومسـروح ووهـوب
ماقولهـا باهـل الـرّدى والخيابـه

وادي الرّمـه من ولبكـم صار مهيوب
بـروس البلنـزا مبعـدينٍ رحابـه

اليـا غـزوا يمّه غـزاة لقوا شـوب
وطبّـوا على بحـر تلاطـم غبابـه

الطّيـب لاهل الطّيـب يذكر ومنسوب
وكلٍ علـى طولـه تفصّـل ثيابـه

والنـاس في دنياك غالـب ومغلـوب
وكلٍ علـى شفّـه يوجّـه ركابـه

واللي من افعال الـرّدى فيه شـاذوب
هـذاك كسّـاب الخنـا في شبابـه

اختـر رفيـقٍ بالقسى يقضي النـوب
وجنّـب عن المنـزوع قل لاهـلابـه

بعد ذلك قام الشاعر العسيلي رحمه الله بارسال هذي القصيدة للسديري يشكره على اعترافه واعتذاره

قال العسيلي وان بدا راس مشـذوب
مرقـاب حرك مـابضميري وجابـه

وبديت باسم الله عن الكل مطلـوب
سايـق هماليـل المطـر من سحابـه

وابديت مافي خاطري يمـه وصوب
من خاطـر جـاش وجهش كل مابـه

اهلا هـلا ترحيبـةٍ تقضي النـوب
ترحيبـة المشفـق بـرؤيـة غيابـه

تحية مثل العسـل صـافي الـذوب
والـذ مـن نقـع المطـر في شرابـه

برسالـةٍ كلـف بها لـي منـدوب
من اعـز مخلـوقٍ وصلنـي جوابـه

من السّديـري ما ركم فيه مكتـوب
عبـارت تطلـق وجه من هو كتابـه

كتـاب تمليتـه وقرّيتـه حـروب
واشهـدتهـم واقع خطـاه وصوابـه

لاشـك ماحصّلت بالخط عـذروب
مافيـه موضـوع عن الزّيـن شابـه

كلامـه الطّيـب قفل كل دالـوب
جميـع دالـوبٍ عنـه صـك بابـه

واجـاب على كل ماكان مطلـوب
فهـم سؤالـي واعتنـى بالاجابـه

اجابـةٍ تفتـح لها صـدور وقلـوب
وتغلـق لهـا ابـواب عليهـا رقابـه

سلم وغنم من قام في كل ماجـوب
وجاب الكلام اللـي حسبنا حسابـه

محمـد فداك من المـلا كل زاروب
اللـي صلاحـه ما يعـادل خرابـه

حقّك عليّـه مانسب العلم مقلـوب
وحقّـي عليك الصّدق في كل جابه

لو كل علـم يم حاكيه منسـوب
وترجـع مناقيده على اللي حكابـه

لاشك احب الصدق والصدق مرغوب
عند الرجال اهل الشـرف والمهابـه

واصاحب اللي صحبته مابها عيـوب
واجفـى الجنـاب اللي يملّـه جنابـه

واجنّب اللي كل ما احتجته يـذوب
ويروح ضحضـاحٍ تلاشـى سرابـه

تذهب مواعيده مواعيـد عرقـوب
ادراج ريـح.. اللــه يخيّـب شبابـه

وللي لبس لي بالصداقه ميّـة ثـوب
ماهـو صديـق ولا هبابـي هبابـه

هذا كلام اللي بدا راس مشـذوب
راس الطّويل الي تقطـع سرابـه


ولكن

هذا الكلام كله ماعجب شاعرنا الكبير رحمه الله سبيل بن سند

ويقول الرواة.. ان سبيل بن سند كان عنده تريلة

قام ودق التريلة سلف ولا وقف الا بالغاط (ديرة السدرة) .. وفتح كبوت التريلة .. ونزل المكينه وقعد اهناك سنة كاملة

وهو يدور السوالف والعلوم .. ولمن خلصت السنة قال قصيدته الشهيره


يقول سبيل بن سند

يأمير يا شين الخطـا منـك شينـاه
ياخوفتـي عقلـك هكاليـوم غايـب

يومٍ مثلـك تزعـل النـاس عوجـاه
رجّال عِـرف ومن حمولـه وشايـب

لاجاهل غر الجهـل فيـه وأغـواه
ولامسردٍ من كل الاطـراف خايـب

أنتـه تقـول القيـل وتجيـد معنـاه
شالك هوى نفسك على غير صايـب

لكـن حنّـا مـن تعـدى أنتحـداه
من دون واجبنـا نجيـد الصوايـب

ياشايبٍ غي الجهـل تـوّ مـا جـاه
يبى يعيـب النـاس والعـود عايـب

يا ضريغط اللي شـال همـه بدنيـاه
ياذيـب بيـن معكرشـات الذوايـب

إن كـان عنـدك للفعايـل امجـازاه
حربٍ عمامك يـوم مـسّ الجنايـب

غصبٍ عليك وصامـل العلـم تلقـاه
ان طاب لك وإلا على غيـر طايـب

أبـوك معطينـا الأخـاوه بيمـنـاه
لـولا الأخـاوه راح مالـه نهايـب

يامـن سواليفـه توسّـخ شفـايـاه
ذيب العلوم ولا ذكـر لـك حرايـب

طوبى مقرّ اللي ولى الحكم وأرسـاه
ياما رسى واليـوم حـدر النصايـب

ورّث حبيب الشعـب عقـب تـولاه
فيصل على كبد العـدو سـم ذايـب

بظلال أخو نوره مشى الذيب والشـاه
خلّى الغنم والذيب تمشـي صحايـب

وخلاّك يالنمـرود تمشـي بحسنـاه
وتحط بالشعب السعـودي عصايـب

والله يالو يدري عن العلـم وأقصـاه
مالك شفاعـة لـو تشفّعـت تايـب

مغترّ فيـك الله علـى الخيـر يقـداه
وش عرّفه لك عند مطلـق حلايـب

ماشاف نـزلٍ لـك يـدق الحونـداه
بمعيلـه مثـل الخـزز واللعـايـب

نـزلٍ نشوفـه والمخاليـق تـدهـاه
نـزل البـلاوي كلهـا والمصايـب

عن روس خلق الله وأنـا أبـراي لله
عن ناس ترعى في طرفك و حبايـب

لو فيك خير ووجهك الشيـن ينكـاه
ماتعتـرض لمكمّلـيـن النـوايـب

وأولاد وايل عـن سوالفـك مغنـاه
ماهـم بعـوزك يامـدوّه زرايــب

قطعانهم عشب الخطر غصب ترعاه
ترعاه أباعرهـم لـو الـدم رايـب

وحربٍ قواطيعٍ على الخيـل وأرمـاه
عوق الخصيم مـورّدة كـل هايـب

وشريدة الفرسـان وشلـون تنسـاه
وشلون تنسى يـا طويـل الخبايـب

اللي على شيـل الجماهـي مضـرّاه
يمنـاه والفسقـان سيـف العطايـب

و(ابن نحيت) اللـي نهـار المثـاراه
كم كبـد حـيٍّ شـب فيهـا لهايـب

على أبلج ٍ خلّـى الظـواري تعشـاه
وبطوع اخو نـوره تعشـى كتايـب

و(ابن جزاء) يوم النضا جاه ينخـاه
وشلـون تنسـى يالعيـن الصلايـب

يومٍ يشيب الراس من حـس طريـاه
بيـن الحناكيـه وذيـك الجـذايـب

و(فيحان) أخو نوره تحت حد شلفـاه
كم فـارسٍ خـلاّ عظامـه حطايـب

اللي بجـاهه يـوم زاره هـل الجـاه
رد الذويبي مال رايح كتايـب

ماخوذ غصب وضمّر الخيل تشعـاه
وشلون تنسـى ياعجيـب العجايـب

ونسيت(منور) ذيـب جمـعٍ سرايـاه
مثل الدبا الكتفـان ريـف القرايـب

حرز الذليـل اللـي يفـك المخـلاّه
نسيت(اخو حسنا)عطيـب الضرايـب

و(ذويخ) بالعربـان تكثـر رزايـاه
إليا شـان نطـق ميليـن العصايـب

كم هيّـةٍ زيزومهـا جـاب حسنـاه
و(سعود) من بعـده يفـك النشايـب

و(ابن جديع) اللـي بهيّـه ضحايـاه
فرسـان قـومٍ فـوق قـبٍ ربايـب

يبـون وضـحٍ بالأباهـر محـنّـاه
افتكهـا ووّهـل جبرهـم نكـايـب

ونسيت (مانع) حوض موت منايـاه
ماتأخـذ ألا محتمـيـن الدبـايـب

كم فارس قـرّب لـه أجلـه وغفّـاه
علـيـه خلاّ للحـوايـم لـوايــب

من كف (اخو فزه) نواعيـه تنعـاه
عليـه هـلات العبايـر سكـايـب

و(نويشي) اللي بالخوي كـلٍ أوحـاه
بثـرا خويـه عـن عوانيـه نايـب

قص أربعه وأثنين والسابـع أنجـاه
انهى الملام وخاطره ماهـو طايـب

وأبوك يالهربـاد مـن فـك بحمـاه
يوم الرصاص بنوع وبل السحايـب

برّم عصب رجليـه وإنّـا احتمينـاه
دونـه فعلنـا معجـزاتٍ غـرايـب

واليوم عنـدك لـه محبـه وملجـاه
غوال ابوك وحايـبٍ بـك حوايـب

والا ما تنسى وطيتـه فـوق علبـاه
وميقافنـا لا دفلجـن بـك ركايـب

جينـاه وأربـاع المبانـي مـمـلاه
فـي كـل بيـت مكتفيـنٍ قضايـب

واللي نـزل عنـده ثلاثيـن جمهـاه
بين الذرا والنـار ضـم الحضايـب

من عرض من ربص هكاليوم بدمـاه
راع النقا والفـوز يـوم الغصايـب

راسه سبق كفه على عـرش ماطـاه
من كف (اخو جوزاء) وابوك السبايب

فعلٍ على وضـح النقـا مأخترعنـاه
ماهـي سواليـف الوجيـه القلايـب

وأضحى جزا ميقافنا اللـي وقفنـاه
شبهتنـا ضيـنٍ رثـع فيـه لايـب

ذيبٍ يرد مـن أول الضيـن لتـلاه
الشكـوى لله ياكبـيـر القطـايـب

والله والله واحـدٍ مــا أتمـهـزاه
بالكـذب..والله يالقلـوب اللبـايـب

لولا القمر وسهيـل والجـدي لـولاه
لأقـول قـولٍ ماتعقبـه طـلايـب

مار بـذرا العنبـر تركـت العلنـداه
ياللي تبـي بالكـذب تأخـذ غلايـب

يالطايش اللي طيشـه كبـر مركـاه
هلا هلا ياحـوش بيـض الترايـب

هذا جـداك وغيـب قلبـك عرفنـاه
مار الغلط مرجوع وانـس الحزايـب

أمـا تعـذّر عـن مقالـك ومنشـاه
عبر الأثيـر ولانبـي لـك نجايـب

يـوم المجلـد كـل حـيٍّ تـمـلاه
تراك مأنـت مـن الأذاعـه نعايـب

دفترك ما خصيت بـه يـوم نقـراه
قاريـه انـا ومسطراتـه عـرايـب

حتـى تعـذّر لـك لنـاس مسمـاه
كرّ النظر واحسب جميـع الحسايـب

كرّ النظر وأضرب علـى ماتـوراه
وعندك طريـق العافيـه والعقايـب

أمّا حفرت البير وأقطـن علـى مـاه
وألا تـدمـه دام مـيّـه سـرايـب

مـادام كـلٍ ماسـك مـاه بـلـزاه
والاتعرّضـت المحـن والصعايـب

يمـك ملاييـن المـدافـع معـبـاه
واقفالـهـا قيـادهـا بالـكـرايـب

الطيـش لايحرمـك لـذ المسـاواه
اعرف ترى للطيش غيـب وغبايـب

ألا عنـدك للخـزا ميـل مشهـاه
معجبك مالك مـن فعولـنٍ رهايـب

فالله خلق للداء دوا وأنـت مـن داه
ودواك للجـراح فـيـه الطـرايـب

يامـا لعينـك مـن مغثـه ومـاذاه
ياللـي بحركـم يامليـن الذهـايـب

بـه حصـةٍ بيضـا تـلالا مغطـاه
غيّم سماها بيـن خضـر رطايـب

مأدري ركبها غبار شيول ومسحـاه
وألا بهـا زدتـم اعـداد الجـلايـب

لاواقفيـن ولا بالأعـيـان شفـنـاه
حظـي بـري لله علينـا رقـايـب

حظي بـري ماقالـوا النـاس قلنـاه
وبحظ من جاب الخبـر لـي جايـب

ياطير ابن برمان مـدري حلايـاه
ياللـي تبـي فينـا تحـط النقايـب

ماهو هلا يالمنتسـب عقـب عفنـاه
حنّا جبرنـا مـا يحـوش القشايـب

ولا عندنـا لـك يامحمـد مناجـاه
خبلٍ تومـي فـي شنبـك الهبايـب

تبي تمثـل عنتـر الخيـل جهجـاه
تمثيـل وألا مسـردٍ مأنـت صايـب

ويقول الرواة .. بعد هذي القصيدة ..أن السديري حس بالاهانة .. وبنفس الوقت ماقدر يسوي شي لسبيل بن سند

فقام السديري وحلق نص شاربه ودش على الملك فيصل .. واسأله الملك فيصل عن شاربه؟

فقال السديري : اكله الحصني طال عمرك!! وهو يقصد سبيل بن سند طبعا.. وعلى امل ان الملك يفهمه وياخذ بحقه :)

فقال الملك فيصل رحمه الله .. وشوفو الرد اللي يدل على الفطنة والذكاء والدهاء

قاله الملك فيصل : وكاد انه لاقي عليه دسم!! واهني سكت السديري .. وعرف انه غلط على حرب .. وان محد راح ياخذ بحقه من سبيل بن سند

رحم الله الشاعر الفحل سبيل بن سند

ملاحظة: قصيدة السديري و العسيلي منقولة من منتديات اخرى

اما قصيدة سبيل بن سند .. فهي عندي بصوت الشاعر نفسه

ولقيتها في منتدى فيها بيتين زيادة .. يجوز ان هالبيتين زيادة عالقصيدة .. او ان البيتين نساهم سبيل بن سند في التسجيل وماذكرهم

والبيتين هم

ونسيت(ابن ناحل) مع الضيف وقراه
هيف السمين اللي بها النـيّ سايـب

اللي يدسّم شـارب الضيـف لاجـاه
الخيل يعطيها وعطا البـل وهايـب


ملاحظة: القصايد والموضوع كله قابل للمناقشة والتوضيح والتعديل
ملاحظة: الهدف من الموضوع القصايد فقط.. وليس التقليل من شأن الاخرين

واسمحولي عالاطالة :)

سبيل بن سند

والله ونعم وثلاث تنعام

شاعر معروف وله موهبه خاصة لاتوجد في جميع الشعراء

صح لسان شاعرنا الكبير سبيل بن سند

ونشكرك جزيل الشكر يا ابو خلف على نقل القصيده المشهورة والرائعة

ياهلا ياهلا ياهلا ياهلا

مرحبا بو مفرح

مرورك عالموضوع يزيده جمالا ورونقا

وشاكرلك على الاطراء

وصح السان الشاعر سبيل بن سند

وحي فاله .. والله انه فحل :)

وشكرا على مرورك يا بومفرح

مجهود طيب ومعلومات مثمره ورائعة

مشكوووووووووووووووووووووووووووور يالعوفي

عــســــاكـ عــلــى الــقــــوه يالـــخــــــال

وســبــيـــــل بـن ســنــــــد الـلـــه يــرحــمــــــــه شــاعـــر حــكـمــــه ومــوعــظـــــه

ولا هـــنـــــــــــــــــــــــــــت

مشكور يالبناخي على هالموضوع

تعديل البيت اللي يقول

هلا هلا والصحيح ماهو هلا

الله يرحم أبو سلمان




انتهى ودمت بود

في بداية الأمر أرتفع ضغطي .. قلت هالحين بيذكر فصيدة العسيلي.. ويترك قصيدة الحصني .. دام الموضوع ذكر أمجاد.. لأنا أحنا يالحروب . معروف عنا أنا أجواد.. لكن بردت كبدي ولله يابو مفرح لاهنت على الجهود الجبارة اللي قمت فيها ....

يوم كلن عصب رأسه لأبن عمه وشاش شش يا رأسي لارحم الله أبو مجناك شش

السلام عليكم..

حمد شريف..

المفروض يشيلون كلمة عضو نشط .. اللي تحت اسمك.. ويحطون دينمو المنتدى :)

تسعدني مشاركتك بالموضوع

وشاكرلك مرورك الطيب

تقبل تحياتي :)

الله يقويك ويخليك يالسنافي :)

والله لايهينك عالمشاركة

خالص التحية..

مرحبا يالناصر :)

شاكرلك عالتوضيح والتصحيح

بس في بيت يقول "هلا هلا" .. وفي بيت يقول "ماهو هلا"

عالعموم التسجيل مو واضح :)

تقبل مني خالص التحية

ولد الحنيني..

قول آمين

الله يهد المنتدى اللي يرفع ضغطك :)

ومو انا اللي بردت كبدك.. اللي بردها سبيل بن سند الله يرحمه

والله لا يهينك عالمشاركة الجميلة

تحياتي..

الله يعزك ياشيخ بغيت افزع يوم قريت القصيده

أما بالنسبه للبيتتين فهي كانت عندي القصيده وكانت موجوده من ضمن القصيده

ع العموم الله يوفقك
ويرحم سبيل الي أخذ حقنا من السديري

أبو فواز المعدوي

شاكرلك مرورك الكريم عالموضوع.. وشاكرك التوضيح بخصوص البيتين :)

تقبل تحياتي

بارك الله فيك وذكرة سالفه


انويشي الحربي

وسوفه اضيفهى في قصص ان شاء الله مع القصيده


بارك الله فيك

الله يبارك فيك ويخليك يابو حرب

ونويشي الحربي.. معروفة قصته

ومع هذا انتمنى انشوفها في المنتدى

ويعطيك العافيه عالمرور الطيب

السلام عليكم ورحمة الله وبركاته

بارك الله فيك يابو خلف ومشكور على هذه القصيدة والتوضيح

وبيض الله وجهك واتمنى من الله لك كل التوفيق

ولاتحرمنا من الابداع القادم

"
"
"

تقبل تحيات
اخوك / احمد هليل العوفي

يعطيك العافيه على الموضوع الممتاز و الجهد المبذول
وتقبل مروري

بيض الله وجهك يالذيب وتسلم يمينك ....

ولا تحرمنا يابو المجد من جديدك ...